رواية مشاعل روعة بس طويلة شوي

تذكير بمساهمة فاتح الموضوع :

ابطال قصتي
مشاعل : عمرها 20 تدرس بالجامعه قسم فنون جميله (رسامه)خخخخخ
طولها 168 -- وزنها 55 --- شعرها طويل مدرج قاصه فراوله لوووول
بني اللون وعيونها عسليه جميله فيها من البراءه مايكفي لنشر السلام للعالم
مملوحه وناعمه وطيووووبه وخفيفه دم بس انها عصبيه ودلوعه ولازم رغباتها تتنفذ
مغروره فيها ميزه انها عنيده مره يعني ماتترك شي ببالها لما تسويه
00000
ابو مشاعل : مقتدر ماديا مظطر دائما لتنفيذ رغبات ابنته الوحيده التي لاتنتهي
متزوج من 3 نساء
الاولى: ام مشعل عندها مشعل وسعود
الثانيه: ام مشاعل وهي متوفيه ولم تنجب الا مشاعل
الثالثه: ام سلطان عندها سلطان وفهد وفيصل
-----------------------

ع شان تعرفي ان الي بيننا انتهى
هنا حست مشاعل ان رجولها ماتشيلها ,,, كان صاعقه نزلت عليها من السماء ولاهي الي موتتها
ولا الي خلتها تعيش
---------------------------------------------------------------------------------------
ام مشعل: هاه حبيبي الحين خلصت اخر دعوه
مشعل: حرام عليك تدري كم دعيتي للحين
ام مشعل: مالي شغل فيك هذولا صديقاتي ,,, وش تبيني اقول لهم ماعزمتكم مافيه كروت
مشعل: ايه بس يمه الحين عددهم 300 وهذا غير الكروت الي راح نعطيها نجود وغير كروت
ام سلطان وغير كروت مشاعل يمه على هالحاله بتعزمين 1000
ام مشعل: حبيبي ام سلطان والله ماتفرح باي كرت غير الكرت الي بتدخل به ,, اما مشاعل بعطيها 50
واهل نجود 150 ,, خير ونعمه 500 كرت زينه
مشعل: اكيد زينه مو انتي الي بتدفعين
ام مشعل: وانت دافع شي من فلوسك الله يخلي ابوك
مشعل: طيب انشالله بتجيبون طقاقه
ام مشعل: هو لاتقول طقاقه يزعلون
مشعل: اجل ايش اقول
ام مشعل: قول مطربه
مشعل: ههههههههههه واله تطوروا الطقاقات , المهم من هي وكم تبي؟؟
ام مشعل: والله ياوليدي مدري هالموضوع خله على مشاعل هي اخبر
مشعل: على قولتك لو بخيلها لك كان جبتي عايشه المرطا
ام مشعل: هو عايشه المرطا ماتت
مشعل: الله يرحمها ,,, يمه مارحنا نعزيهم
ام مشعل: ههههههههههههههههه, الله يقطع شيطانك ,, اركد عرسك بعد شهر ,,, لاتقول العروس زوجوني خبل
--------------------------------------------------------------------------------------

في هالوقت مشاعل كانت في حاله صدمه, تكلمت والدموع ماليه وجهها وهي في حاله
انهيار: غسان انت صادق نسيت اشكر طلال على انه عرف يربيني ,,, مو بس كذا,, ودي اشكره
بعد على كل لحظه عيشني فيها ملكه ,,, وعلى كل كلمه حلوه,,, على اهم درس وهو اني مالعب بمشاعر
الناس ... ((وقفت شوي لانها حست بعبره مو مخليتها تقدر تنطق )) غسان انا الحين قدرت اتخيل
الاحساس بالكذب والخيانه ,,, ((ابتسمت بحزن)) يمكن لاني ماحبيت قبل ,,, بس بعد ماحبيت طلال
بديت احس بحلاوه الدينا وبحلاوه الحب ,, ((ونطقت كلماتها بصعوبه وبهمس)) وصعبه اني
اتخيل كيف بعيش بدونه
طالعت طلال بحزن ,, ورجعت تكلم غسان: بس ياغسان لاتتوقع انك او غيرك من الي كنت اعرفهم كنتوا تحبوني
لان لو اي واحد منكم حبني من قلبه ,, ماكنت سويت معاه الي سويته ,,, بس كنتوا تتسلوا مثل ماكنت
اتسلى ,,, بس صدقني ياغسان لما يجي الحب راح تحس فيه بدمك وبعقلك ,,, راح تحس انه يغزو قلبك

ووقتها راح تحس باحساسي الحين
كانت تكلم غسان وكأن طلال مو موجود
رجعت طالعت طلال وبنظره مليانه بالحزن تفطر قلب اي شخص يشوفها: طلال الله يوفقك وين ماتروح
انا مو حاقده عليك,,, انت وصلت لي رساله عمري ماراح انساها ,,, ان الحب لعبه والشاطر الي
يغلب,,, بس طلبي اذا تزوجت ابيك تعزمني ابي اشوف البنت الي راح تختارها,,, ابي اشوف مكاني الي كنت احلم فيه
وقتها طلال طلع بدون مايكلمها
مشاعل حست انه ماطلع من الغرفه بس,,, حست انه طلع من حياتها ,,,, انهارت ,,, دموع وصياح وصراخ
غسان : اذا خلصتي تلقي السواق برا ينتظرك
وطلع وسكر الباب
------------------------------------------------------------------------------------------

ساره كانت في الحفله بحدود 11
ساره: هههههههههههههههه متخلفات ,, شوفي لابسين مثل بعض قديمين مسوين خويات
مها: من جد ,, اكره البنات الي يلبسوا مثل بعض احسهم قرويات
ساره: لاومسوين رقصه وحده ههههههههههههههههه
مها: ههههههههههههههههههه احس اني بفلم كوميدي
وساره ومها استلم حش بالبنات,, وطبعا مايتوقعوا ان احد يسب فيهم,, لان هذا طبع الحريم يسبون
بس يقولوا لالا احنا محد يسب فينا خخخخخخخخخخ
ساره: قهر ياليت ميشو معانا تقطع بهالبنات
مها: من جد
ساره: اقول مهاوي احس اننا عجايز بس جالسين وحش ,, تعالي نرقص
والبنات فالينها بالحفله
------------------------------------------------------------------------------------------
اما الطرف الثاني فيه وحده متعذبه ومصدومه ,,, مشاعل بعد من انهارت,, وبعد سيل الدموع الي دمعته
قررت تجمع جروحها والي تبقى من كرامتها وتطلع,, طالعت الساعه كانت 11 ونص ,,, كم مر من الوقت
من بعد ماطلع غسان يمكن ساعتين او ثلاث يمكن اربع,,, ماكانت تدري لانها كانت في حاله انهيار
حتى مافكر طلال يطل عليها يتطمن ,,, اخذت شنطتها وطلعت,,, لقت السياره بالكراج وجنبها السواق ينتظرها
مشاعل" يا الله ياطلال مرتب كل شي ,,, ومخطط لكل شي,, بس ماعرفت انك قتلت انسانه"
ركبت السياره ,,, وظلت في السياره ساكته ,,, وصلت البيت وكان ابوها ومشعل يركضوا ناحيتها
ابو مشعل: مشاعل وينك لي ساعتين اتصل عليك وينك؟؟؟؟
مشاعل: بابا انا كنت طالعه لبيت صاحبتي
ابو مشعل: مشاعل ايش في وجهك ,,, كنتي تبكين؟؟؟مشاعل ايش صار؟؟؟
مشاعل تحاول تمسك نفسها: لابابا بس تذكرت ماما هذا كل الموضوع
ابو مشعل بحزن: كلنا نحب شيخه(ام مشاعل)بس يامشاعل هذا مو معناه اننا نعذب نفسنا ,,, ادعي

لها بالرحمه هذا الي تحتاج له
مشعل: ميشو حبيبتي تعالي نطلع نتمشى ,,, يمكن تتحسن نفسيتك
مشاعل تطالع اخوها بحسره: لا يامشعل الى مات عمره مايرجع لاالطلعه بتنسيني ولا الجلسه
مالي الا اعد الايام لما ينتهي عمري
ابو مشعل: لايامشاعل اعوذ بالله ايش هالكلام عقب عمر طويل انشالله حبيبتي لاتقولي كذا,,, حبيبتي ايش صاير
تذكرتي امك بيوم وليله
مشاعل بحزن: انا عمري مانسيتها ,,, انا وحيده يابابا
بكت بصوت يقطع القلب ,,, وقتها ابوها ضمها لصدره وماتتوقعوا ايش صار,, ابو مشاعل الرجل القوي
بكى لحزن بنته ,,, كان عارف انها قويه ومايهزها شي,,, حزن لحزن بنته الوحيده
مشعل : ميشو تعوذي من ابليس وتعالي اقرى عليك قران
مشاعل تبعد عن حظن ابوها: مشعل انا تعبانه ابي انام الله يخليكم مابي احد يزعجني
ابو مشعل: والرحله ماراح تروحي
مشاعل: لا بابا بعدين
كانت داخله البيت ولما وصلت الصاله كانت ام سلطان موجوده في الصاله ,, وانصدمت لما
شافت وجه مشاعل
مشاعل: ام سلطان
ام سلطان: نعم
مشاعل: اذا انا غلطت عليك باي يوم سامحيني ,,, الله يخليك سامحيني ,, انا اسفه
ام سلطان انصدمت: لالا مو مشكله
مشاعل: مابي انام الى لما تقولي انك سامحتيني
ام سلطان: مشاعل ايش صاير؟؟؟
مشاعل تبكي بصمت: الله يخليك,, اترجاك سامحيني
ام سلطان بصدمه: انا مسامحتك
مشاعل: الله يجزاك خير ,, عن اذنك اسمحي لي بروح غرفتي
ام سلطان مو مصدقه هالادب الي نزل على مشاعل بس عرفت ان فيه شي لان وجه مشاعل يدل
على وحده منهاره من موضوع كبير

طلعت مشاعل غرفتها بصعوبه,, دخلت الحمام ,,,, فتحت الدرج الخاص بالادويه,,, جمعت كل الحبوب
الموجوده عندها ,,, دخلت الغرفه وتمددت على السرير ,,, فتحت علبه الادويه كلها وجمعتها
كانت فوق 50 حبه,,, طالعه يدها الي فيها كل الحبوب ,, ورجعت لذاكرتها لقبل يوم ,,, كانت في قمه السعاده
لدرجه ان كل صاحباتها يحسدوها على طلال وعلى السعاده الي عايشه فيها,,, بس كل هذا تحطم
,,, ومستحيل تقدر تعيش ,,, بعد ماحست بطعم الحياه مستحيل انها ترجع لحياتها قبل ,,,
اخذت ورقه وقلم وكتبت عليها ((خاص لساره ارجوكم رجاء محد يقراها الا ساره)) كتبت
في الورقه
ساره انتي اعز وحده من صاحباتي ,, وصدقيني اني احبك ,,, انا اعرف انك لما تقري هالرساله
راح تكوني زعلانه مني ,,, لاني كنت ضعيفه وماقدرت اصبر واصمد ,, بس انتي عارفه طلال
ايش هو بالنسبه لي ,, بليز سامحيني
تركت القلم,,, طالعت يدها ,,, واخذت كل الحبوب ودخلتها بفمها ,,,

الجزء الثامن


طالعت الحبوب الي بيدها عزت عليها نفسها ,,بنت بعمر الزهور ,,,
ليش مو قادره تكون سعيده
مشاعل" يارب اغفر لي ,,, ضاقت بي الحيله,, لاام الجأ لها ولااخت
الوحيده الي كانت تفهمني جدتي الله يرحمها بس حتى جدتي راحت
وتركتني ليش كل الي احبهم يخلوني ,,, ااااااااااه مافيني اصبر اكثر
يارب اغفر لي يارب"
واكلت الحبوب
----------------------------------------------------------------------------------------

كان داخل البيت ومتضايق من الي صار
ام مشعل: مشعل وينك هاه بشر ايش فيها مشاعل
مشعل: والله مدري يمه ,, انا خايف عليها رجعت للبيت منهاره مدري
ايش فيها؟؟؟
ام مشعل: ماعليها يمكن متمشكله مع صديقاتها
مشعل: لايمه مشاعل مافيه شي يهزها ,, لو انها من البنات الدلوعات
كان انحاشت من زمان من معامله ام سلطان لها ,, بس مشاعل مايهزها
الى الشديد,, يمه انا خايف عليها
ام مشعل: يويل قلبي على بنيتي ,,, لاتخوفني عليها ,, بروح لها
مشعل: لايمه ,,, هي طلبت مني ومن ابوي ان محد يزعجها ,,, وقالت
تعبانه ابي انام,, بكره انشالله الصباح بروح لها ولازم اخليها تتكلم,,
لازم اعرف ايش فيها
ام مشعل: يمه مقدر انام وانا ماتطمنت عليها ,, بدق على تلفونها اتطمن عليها
مشعل: يمه لا,,, خليها ترتاح ,,, هي تبي تجلس مع نفسها ,, خليها يمه
وبكره انشالله ماراح نخليها
ام مشعل: ياوليدي قلبي ناغزني انها محتاجه لي
مشعل: لايمه انشالله مافيها شي بس هي تبي ترتاح
سمعوا صوت ابو مشعل: لاتخافون عليها عندها ام سلطان ماتقصر
انشالله
ام مشعل في نفسها" والله لو تشوفها بتموت والله تتلذذ بموتها"
مشعل: ونعم فيها يبه ماقلنا شي بس انت عارف مشاعل كتومه
ابو مشعل: ايه علشان كذا انا جيت ابيك ياام مشعل
ام مشعل باستغراب: سم يابو مشعل امرني
ابو مشعل: ابيك تسمحين لي بليلتك ودي انام عند ام سلطان ودي اكون
جنب بنتي
ام مشعل : ايه كذا نكون متطمنين عليها
ام مشعل مستحيل تستغنى عن يومها بس علشان عيون مشاعل تكرم مدينه
مشعل: يبه واذا جد اي شي علمنا
ابو مشعل: انشالله ,, تصبحون على خير
-------------------------------------------------------------------------------------------

ساره ومها في الحفله,, دق موبايل ساره
ساره: الو
ام ساره: هلا سارونه حبيبتي
ساره: هلو ماما وحشتيني
ام ساره: وانتي اكثر
ساره: رجعتي والا توك
ام ساره: ايه انا في البيت,, وانتي توك بالحفله
ساره: ايه ماما لسى الحفله مابدت
ام ساره: ههههههههههههههه وانشالله متى بتبدا
ساره: يعني على 2 الفجر,, لسى ماجوا كل البنات
ام سلطان: هاه وناسه وكيف حفلتهم حلوه؟؟؟؟
ساره: ايه ماما مره تجنن ولو ان القراوى في كل مكان ههههههههه
ام سلطان:ومن جايبين مطربه؟؟؟
ساره: جايبين العنود ومره الحفله خطيره وناسه ماما
ام ساره: ومتى بترجعي حبيبتي؟؟
ساره: يعني على 7 الصباح
ام ساره: طيب انتبهي على نفسك
ساره: انشالله ماما تصبحي ع خير
ام ساره تقلد صوت ساره: تصبحي على خير ,,,بس كذا ,, وين بوستي؟؟؟
ساره تحاول تصرف: مانسيت بس كنت بشوف تتذكرين والا لا,,, وعموما هذي بوستك
اموااااااااااااااااااااه
ام ساره: يله حبيبتي تصبحي ع خير
ساره: وانتي من اهل الخير
كانت ساره ومها والبنات فالينها ومو حاسين بمشاعل
مها : اقول سارونه كم الساعه
ساره: هذي الي ماتلبس ساعه ,, شوفي الحين تذلين نفسك للي يسوى والي مايسوى
مها: وانتي اي وحده منهم

ساره عصبت: طبعا الي يسوون
مها: وكم تسوين
ساره: يامصلك اقول وين مشاعل بس مو انتي ,, المهم الساعه 1 ونص ليش؟؟؟
مها: لان اخوي بيمرني 3
ساره انصدمت: 3 مجنونه الناس يدخلوا وانتي تطلعي
مها: حبيبتي اخوي بينام مو فاضي لي
ساره: طيب خليه ينام انا ارجعك
مها: لالا تبين اخوي يذبحني ,,, لاحبيبتي الحمدلله الي خلوني اهلي اجي,,, لازم انام هنا علشان تنبسطي؟؟؟
ساره: ياشينك مهاوي خلينا ننبسط اصلا السهره ماتبدا الي من بعد 3
مها: لا انا سهرتي بدت 12
ساره عصبت منها: انقلعي كيفك ,,, اصلن انا غلطانه الي اجلس معاك
مها : ههههههههههههه لاتعصبين البنات كلهم موجودات
ساره: طيب اوريك

مشاعل تسمع صوت ابوها وهو داخل غرفته مع ام سلطان ,,, لها 10 دقايق من كلت الحبوب
بدت تحس بضيق في التنفس وجسمها ثقيل ومو قادره تشيله وحست حرارتها ارتفعت ,,
كان شريط حياتها يمر قدامها ,,, موت امها ,, كانت طفله يتيمه مالها ام تشكي لها وتبكي
بحظنها ماعندها ام تنام بحظنها ,, ولا لقت الي تشتكي لها لما تنضرب او لما تصير لها
مشكله بالمدرسه كانت بكل سنه بالمدرسه لما يسووا حفله الامهات تغيب
عن المدرسه اسبوع علشان ماتسمع البنات يحكوا عن امهاتهم وعن
الحفله ,,, كانت محتاجه لها ,, مالقت الي يعوضها عن امها كان ابوها
مشغول بجمع الفلوس والسفر ,, اما خالاتها كانوا بجده ومتزوجات كانت
امها اصغر اخواتها وكانوا مشغولين بازواجهم وبعيالهم,,, اما حريم
ابوها كانت ام مشعل حنونه عليها لكن ماتعوضها عن امها,,, الوحيده
الي كانت تفرح لما تشوفها وتحبها هي جدتها الي كانت تحبها بجنون
وكانت تفرح بشوفتها ,, وكانت تتمنى تعيش عندها بس ابوها كان
معارض هالشي كانت تروح تزورها اربعاء وخميس ,,, وهي في شده
تعلقها بجدتها ماتت وخلتها وحيده من جديد كانت في 14 من عمرها
وكانت داخله سن المراهقه ومحتاجه لام ,,, وكان حبها لجدتها يخفف
عليها فقدها لامها ,,, بس حتى جدتها الي حبتها اختفت للابد,,, ليش اذا
تعلقت باحد يروح 3 بحياتها الي اكيد حبتهم من قلبها هم امها وجدتها
وطلال الي هو سبب بموتها وسبب بعذابها كان ممكن يعوضها عن كل
شي ويعطيها الحنان الي فقدته وكان ممكن يكون الام لها والاب والاخ
والاخت كان ممكن يكون حياتها بس.............. راح مثل امها وجدتها ,,
, مستحيل تقدر تتحمل كانت هذي الافكار الي تدور براس مشاعل
فجاءت حست بطعنه ببطنها مثل السكين ,,, حست باحد قاعد يطعن فيها ببطنها وبكل جسمها
حست انها تلفظ انفاسها ,,, حست بكل خليه بجسمها تبكي وتقول ليش
مشاعل ارحميني مو قادره تتحمل الالم ,,, كانت تتوقع ان الانتحار سهل
وبمجرد انك تاكل الحبوب راح يغمى عليها وتموت مثل الافلام
بس لا ,,, الحين الام يذبحها ,, تخيلت نفسها ميته واهلها يدفنوها ,,
تخيلت نفسها في القبر وحيده ايش راح تقول لربها ,,, ليش قتلت نفسها,,
هل الوحده والهم عذر علشان تقتل نفسها؟؟؟؟
الالم يذبحها بس خافت من الالم الي بتشوفه بعد الموت ,,, تذكرت النار
والجنه ,,, كان ممكن تصبر وتحتسب الاجر وتتوب لربها,,, مر شريط
حياتها بسرعه بس مالقت الا كل الذنوب والمعاصي ,,, تخيلت انها اذا
راحت لاحد من صاحباتها تكون متجهزه ولابسه احلى ماعندها ودايما
ماتروح ويدها فاضيه,,, بس الحين بتروح للقبر ايش راح تاخذ معها
ايش راح يكون لبسها المعاصي والذنوب؟؟؟؟ ندمت ,,, دايما الشخص
الي ينتحر يندم على اللي سواه اذا حس بقرب الموت,,, فكرت طلال
يستاهل الي سويته؟؟؟ اكيد الحين مبسوط مع اخوياه؟؟؟ وانا ايش
مصيري
حاولت تقاول الالم وحاولت تقوم بس رجولها ماساعدتها لسانها ثقيل مو
قادره تتكلم ناهيك عن الالم الي بيذبحها والغثيان الي تحس فيه ,,,
حاولت تزحف ,, وتمت تزحف لما وصلت للباب
بذلت جهد كبير علشان توصل يدها للمفتاح ,,, وبعد محاولات فتحت الباب

حاولت تزحف تدور اي شخص ,,, طالعت غرفه ابوها كانت بعيده
وماتتوقع انها تقدر توصلها اكيد راح تموت قبل توصلها
التفتت يمين ويسار لقت اقرب غرفه لها هي غرفه اخوها فيصل
راحت تزحف لحد ماوصل حاولت تطق الباب بس فيصل كان نايم
حاولت تفتح الباب وبعد مافتحته دخلت وبصعبوه وصلت لسرير فيصل
مشاعل بصعوبه: فيصل قوم قوم
فيصل: اوووووووووه ميشو روحي
مشاعل بهمس : فيصل روح ناد بابا بسرعه انا بموت
فيصل يبكي لانها خربت نومه معذور صغير مايدري ايش يصير: خلاص
ميشو روحي اف ابي انام
مشاعل كانت تتكلم بصعوبه لانها تبذل جهد كبير وجسمها مو متحمل: روح ناد بابا
فيصل الله يخليك
فيصل من ورى الفراش : خليني انام مابي اروح
مشاعل حاولت تصارخ ماقدرت فكرت انها مالها امل الا اناه تضرب
فيصل علشان يروح يصحي امه
حست بان الحياه غاليه وماتبي تموت
حاولت تقوم بس حست بطعنه قويه في صدرها وفجاءت حست بغمامه
سوداء ولحظتها اختفت الحياه من عيون مشاعل

والله انك منت رجال,, قالها حسين وهو متنرفز من الحركه الي سواها
سلمان في مشاعل
سلمان: تارك الرجوله لك ,,, بعدين مو انا الي خططت ,, غسان هو
صاحب الفكره ,, وانا وطلال نفذنا
حسين: وانتم منتم رجال مالكم كلمه,,, ماتعرفون تقولون لا بس وراه,,
وين قلبك ياسلمان ,, وين رجولتك والله كنت اظن انك رجال بس طلعت
ورع ويمشونك الناس على كيفهم
سلمان: اخس واقطع ورع بعينك ,,,, احترم نفسك ياحسين لايصير لك
شي تندم عليه طول عمرك
حسين: لاتهددني انا ماخاف منك ولا عشره من امثالك وامثال غسان,,
انا ع الاقل عندي شخصيتي واقدر اقرر وارفض وقت الي مايعجبني
الشي مو اسكت وامشي ورى غسان
سلمان بعصبيه :انا مامشيت وراه ,, بعدين انا مقتنع باللي سواه,,, نسيت
الي سوت فيني والا حرام علينا وحلال عليها
حسين: هي بنت ياغبي فرق ,,, انت حمار ماتفهم ,,, ياخي انت رجال مايضرك لو البنت
سوت فيك اي شي لان الرجال ماينهز بس المره مسكينه حساسه وتلقاها الحين منهاره ,,
للاسف انك تقرب لي

جميله

سلمان: اقول لاتغلط ياحسين,, والي انت جاي تصارخ علشانها روح دق
عليها خلها تنفعك تبيع ولد عمك علشان بنت ,,, كفوك
حسين: ع الاقل هي ماضرتك ولافكرت تجرحك يوم من الايام والله مع
انها مره بس هي ارجل منك
سلمان: ماكذبت علي ؟؟؟ ماكلمت غيري مليون واحد؟؟؟ ماكذبت علي وقالت لي احبك؟؟
حسين: انت عارف انها ماكانت تحبك ,,, ولاانت حبيتها ,,, انت كنت
توهم نفسك انك تحبها,,,انت كنت معجب فيها وانا متاكد لو مشاعل مو
حلوه مافكرت فيها,,, ولو لاسمح الله تشوهه وجهها انت اول من يتركها
انت ياسلمان تبي تكشخ عند اخوياك ان خويتك حلوه ,,, يالله هذا حب,,,
لاتلومها,, وبعدين حرام عليكم ايش سويتوا فيها
سلمان: لاتخاف قطوه ام 7 ارواح,, دق عليها وتاكد
حسين: ادق عليها ,, ياليتها ترد علي,, لها فتره ماترد علي
سلمان: هههههههههه بعد وجاي تدافع عنها ,, مسكين اظاهر انك انت الي تحبها
حسين: للاسف لا انا ولا انت نستاهلها ,,, مشاعل ماترد علي من فتره
تدري ليش؟؟؟
سلمان: ليش؟
حسين : علشان الكلب طلال الي مايستاهل ظفرها حسبي الله عليه ,,
دقت علي وقالت لي ماتصدق ايش كثر احبك انت اعز صديق واقرب
اخ لي بس انا احترم قرار طلال ,,, لانه زعل لما عرف اني اكلمك وانا
لو مكانه مارضيت يكلم بنات غيري,, شف الاخلاص كان ممكن تكلمني
وهو ماراح يعرف بس حبها له خلاها تخاف على شعوره ,,, والله تمنيت
ان مشاعل حبتني انا والله لاخليها اسعد وحده بالدنيا مشاعل اطيب
انسانه قابلتها يمكن عيشتها مع مرت ابوها وانشغال ابوها هو الي خلاها
تكلم بس والله هالانسانه عمري ماراح انساها في قمه حزنها تضحك,,
تخاف علي اكثر من نفسها ,,, القهر انها تعتبرني مثل اخوها ,,,
والمشكله الثانيه انها اكبر مني بسنتين,,,انا ماهمني لو اكبر مني
بعشرين سنه ,,,بس هي تعتبرني اخوها الصغير,,, سلمان ماتتخيل شلون
حياتي بدونها ,,, كانت حنونه علي وتخاف علي ,, اذا تعرفت على بنت
تروح تتعرف عليها ع شان تعرف انها ماتتكلم فيني او تكذب علي ,,
كانت تخاف علي من اي شي انسانه تعطي وماتقول هات,,, سلمان انت
ظلمت نفسك قبل تظلمها

ساره كانت تدق على مشاعل ماترد كانت بتطمن عليها قبل تركب
الطياره لان رحلتها 3 الفجر,, ولما تعبت دقت على يزيد تبي تعرف
ايش صار على طلال,, بس مارد,, ارسلت له رساله
((يزيد اذا شفت مسجي كلمني ,, ابي اعرف ايش صار على طلال ,,لان مشاعل ماترد علي))
بعد دقايق دق يزيد
ساره تصارخ علشان يزيد يسمعها لان صوت الاغاني مغطي ع صوتها: هلا يزيد
يزيد: هلا ساره ايش هالازعاج وينك
ساره: انا في حفله وحده من البنات ,, المهم ماتدري عن طلال وينه؟؟؟
يزيد بشك: لا ليش مشاعل مو معاك؟؟؟؟
ساره: لا مشاعل اكيد الحين بالمطار لان رحلتها 3 ,, بس مدري ايش
فيها ماترد قلت يمكن طلال مارد عليها
يزيد: اها ,,, لا مدري عنه ,,, بس انتي كلمتيها وماردت؟؟؟
ساره: مليون مره دقيت عليها ,, قلبي ناغزني ,,, بس الوقت متاخر
اخاف ادق على بيتهم ترد مره ابوها النسره
يزيد: مدري حتى طلال مارد علي,,, بس اذا ردت عليك علميني
ساره: انشالله وانت اذا دق عليك طلال قول لي

يزيد: انشالله باي
ساره: باي
يزيد رجع طالع موبايله ودق
يزيد: هلا طلال
طلال: هاه يزيد ايش قالت لك؟؟؟
يزيد: تقول ماترد عليها ,,, ورحلتها 3 الفجر
طلال: انا في المطار ,, الحين الساعه 2 ونص ورحلتها بعد نص ساعه
وهي مو موجوده
يزيد: طلال مدري تقول البنت انها ماترد عليها
طلال: اكيد ماراح ترد هي ناسيه موبايلها عندي,, طيب قول لها تدق ع البيت
يزيد: خلاص ياشيخ لاتقلق عمرك اذا البنت تبي موبايلها بتدق عليه
طلال: ايه بس يمكن الحين تدور عليه
يزيد: عادي تلغي الشريحه وتشتري جهاز جديد,,, وانت ماشالله صحى ضميرك؟؟؟
طلال بعصبيه: ضميري مامات ع شان يصحى ,,, المهم اذا جد شي اتصل علي
يزيد: انت قلت اتصل علي يعني لاتزعجني كل 5 دقايق ,, اذا صار شي بدق عليك,,, طلال
طلال: سم
يزيد يبي يقهره: متاكد انك مو ندمان
طلال بعصبيه : ياخي دمك ثقيل ليش؟؟؟؟ بعدين لو انا ندمان ماكان
سويت الي سويته
يزيد: يعني قلت يمكن ندم الولد ويبي يرجع لها
طلال باستهزاء: مشكلتك تشوف افلام هنديه كثير الله يصلحك
يزيد: والله عاد الافلام الهنديه خطيره,, والله مره شفت فلم هندي
صحت عليه يومين
طلال بضيق: يله بس عن الهذره ,,, لاتنسى تدق ,, واذا اتصلت رد
يزيد: ابشر طال عمرك اوامر ثانيه
طلال: لا باي
------------------------------------------------------------------------------------------

كان مشعل وابو مشعل وام مشعل في الممر ينتظرون الدكتور يبشرهم,,
, مرت الدقايق كانها ساعات
والساعات كانها دهرا
واخيرا طلع الدكتور ووجهه باين عليه التعب
ابو مشعل: بشرني يادكتور ايش صار ,, بنتي ايش فيها
الدكتور بعصبيه: الحين تسال عنها وينكم عنها لما حاولت الانتحار
كلهم انذهلوا مشاعل تنتحر مستحيل
الدكتور: حتى ماقدرنا نشخص الحاله ,, وهذا الشي هو الي خلانا
مانسوي لها الغسيل بسرعه انتظرنا لحد ماطلعت نتيجه التحاليل
والاشعه ,, شلون انتم عائلتها وينكم عنها؟؟؟؟
كلهم انصدموا من الي سمعوه ومو قادرين يردوا ع الدكتور
مشعل حاول ينطق: دكتور شلون تنتحر مشاعل ماكان فيها شي ليش تنتحر؟؟؟
الدكتور: انا ماني دكتور نفسي ولا انا عايش معها في البيت ع شان اجاوبك المفروض انت
الي تجاوبني شلون بنت في عمر الزهور من اجمل الناس الي شافتهم عيني المفروض تكون
سعيده مو تحاول تنتحر ,,, وشلون ماتدرون عنها ,,, وحتى لما جبتوها ماكنتوا عارفين
ايش فيها كان سهلتوا علينا المهمه وعليها
ابو مشعل برعب: يعني بنتي بتموت؟؟؟؟
الدكتور: هذا الحل برايك انها تموت وبس عموما الشرطه في الطريق واتمنى
تجاوبوا على كل الاسئله
ابو مشعل يصارخ ع الدكتور: تتوقع اني بقتل بنتي ,,, انا ماهمتني
الشرطه ,,, ابي اعرف بنتي ايش فيها؟؟

الدكتور خاف من صراخ ابو مشعل وحس انه مصخها: عموما احنا
سوينا لها غسيل معده,, بس المشكله الحبوب بدا مفعلوها ع الجسم اولا
لانكم ماانقذتوها بسرعه وثانيا لاننا ماكنا نعرف انها ماكله حبوب ومن بعد
الوقت الي ضاع في التحاليل والاشعه سوينا لها غسيل معده بس بعد
ماتصحى بنعرف ايش حالتها بالضبط؟؟؟
ام مشعل تعبت من الغاز هالدكتور وتبي تعرف الزبده تبي تطمن ع مشاعل: يادكتور علمنا وش بيصير في بنتي
الدكتور: ماعرف لانها طولت يمكن الحبوب تاثر عليها مثل بعض الحالات وممكن لا يعني يومين ثلاثه وتطلع
ام مشعل: ومتى بنعرف؟؟؟؟؟؟؟؟؟؟؟؟؟؟
الدكتور : لما تصحى انشالله بس انا مابي اخوفكم الحبوب الي اخذتها قويه مره والله يستر,, ادعوا ربكم
ام مشعل اغمى عليها
------------------------------------------------------------------------------------------

جميله والله

ساره كانت في الطريق راجعه من الحفله بحدود الساعه 7 لما دق عليها يزيد
ساره: للحين مانمت؟؟؟
يزيد: لا حبيبتي كنت خايف عليك ابي اتطمن انك رجعتي((في نفسه جعلك مارجعتي))
ساره: يااقلبي ايش راح تسوي لما اسافر لايطاليا؟؟؟؟
يزيد: اكيد راح انجن
ساره:ههههههههههه ياقلبي بسم الله عليك
يزيد: هاه قلبي مادقت صاحبتك مشاعل؟؟؟
ساره: لا للحين ادق عليها وماترد
يزيد: طيب دقي ع بيتها اكيد اهلها صاحين
ساره:لا بدق اذا صحيت اخاف مرت ابوها نايمه واصحيها وتذبحني
يزيد بعذوبه: واذا قلت لك عشان خاطري؟؟؟
ساره بدلع:حبيبي مقدر اخاف تهزئني ترضى ام سلطان تهزئني
يزيد: لو تطلبي مني طلب لسويه لو فيه قطع رقبتي
ساره: طيب خلاص بتصل,, واذا ردت ياويلك مني
يزيد: هههههههههه الله يستر يله باي
دقت ساره ع بيت مشاعل محد رد وكانت بتقفل بس سمعت صوت
ام سلطان بتعب: الو
ساره خايفه: خالتي اسفه صحيتك مشاعل ماترد علي وانا خايفه عليها
ام سلطان بعصبيه : هذا وقت تتصلي فيه
ساره: خالتي اسفه بس خفت ع مشاعل بشوف سافرت والا لا
ام سلطان: لا ماسافرت ,,, هي في المستشفى
ساره برعب: ليش ايش فيها؟؟؟؟؟؟؟؟؟؟
ام سلطان: مدري لقيناها مغمى عليها ووداها ابوها للمستشفى والحين قفلي انتظر ابو مشعل يطمني
ساره: طيب خالتي باي مستشفى؟؟؟
ام سلطان: مدري
وقفلت بوجهها
ساره انجنت ولامت نفسها كانت ترقص ومبسوطه ومشاعل تعبانه ,,,
كانت راح تتصل على ام سلطان تترجاها تقول لها اسم المستشفى بس
هونت لانها اكيد ماراح تقولها,,, اتصلت على كل المستشفيات الكبيره
الي تتوقع مشاعل تروح لها,,, بس كلهم قالوا ان مافيه مريضه بهالاسم,,
تذكرت ان فيه مستشفى حكومي جنب بيت مشاعل بس مشاعل ماتحب
تروح له لانه زحمه ومايدخلون المريض الا لما يموت قالت ادق اشوف
,, ولما دقت فعلا كانت موجوده ,,, قالت للسواق يوديها هناك,, كانت

هاه بشرني صحت مشاعل والا توها,,, قالتها نجود الي تتصل على
مشعل كل شوي تطمن على مشاعل
مشعل: لا لسى بس انشالله خير
نجود: وخالتي كيفها الحين؟؟؟؟
مشعل: والله مسكينه ماوقفت صياح
نجود: الله يقومها بالسلامه وماتشوف شر ,,, انشالله الطيحه ماتاثر فيها وتقوم لكم بالسلامه
((كان مخبي ع نجود موضوع الانتحار ,,, حتى لو كانت زوجته فهي غريبه,,, خاف من كلام الناس))
مشعل:امين يارب,,,انتي نامي واذا صار شي بدق عليك
نجود: مقدر انام وانتم في هالحاله مستحيل يجيني النوم,,, ياليتني معكم اخفف عنكم شوي
مشعل: ماتقصرين
لما قفل التفت على صوت بنت كانت تبكي بصوت عالي ,,, وشافها اتجهت ناحيه امه ,,,
وشاف امه تضمها استغرب من تكون؟؟؟؟
ساره: خالتي طمنيني على مشاعل الله يخليك ايش صار؟؟؟
ام مشعل وهي تبكي: حالها مايطمن ادعي لها يابنتي
ساره حست قلبها بيوقف:ليش خالتي ايش فيها ميشو؟؟؟؟؟
ام مشعل حكت لمشاعل القصه كلها وانجنت ايش الي خلا مشاعل تنتحر ,,,
كانت فرحانه بوجود طلال بحياتها وحست ان مشاعل صارت بنت ثانيه
كلها امل وفرح وسعاده,, تذكرت انها كانت خايفه على طلال واكنت
تدوره ,, لامت نفسها لانها ماتذكرت صاحبتها وماحاولت توقف معاها ,,
كانت مشاعل محتاجه لها ,, كانت خايفه من اختفاء طلال يكون صار له
شي,, بس ساره شافت الموضوع عادي لان الشباب يختفون فتره
ويرجعون,,, بس ماكانت تعرف ان طلال ومشاعل كانوا يكلموا بعض
كل ساعه ولما طلال يطول ساعتين مايدق عليها كانت مشاعل تسوي
مناحه,,, صح فكرت غريب اختفاء طلال بس ليش توها تفكر بهالشيئ,,
خافت فكرت ان طلال مات وان مشاعل انتحرت علشانه,, بدون ماتحس
دقت على يزيد
يزيد: هاه طمنيني
ساره: يزيد طلال ميت
يزيد انصدم شلون مات وهو توه مسكر منه: من قال؟؟؟
ساره: مشاعل
يزيد انصدم اكثر لان مشاعل ماتكلم طلال:وهي ايش عرفها؟؟؟
ساره: مشاعل انتحرت
هنا يزيد انصدم صدمه معقوله تحب طلال لدرجه انها تنتحر,, حس بغلطه
اصحابه في حقها وشلون بيكفرون هالذنب ,,, قتلوا انسانه بريئه مالها
ذنب الا انها حبت بصدق
يزيد بصدمه: ماتت
ساره: لا الحمدلله لحقوها اهلها ,,, بس اكيد طلال مات ,,,مشاعل ليش
تنتحر الا علشان طلال,,,هي كانت خايفه عليه واكيد سمعت خبر عنه
يزيد: هي قالت لك كذا
ساره: لالا هي ماصحت للحين والدكتور خايف ان يصير لها شي بعد
ماتصحى لان الحبوب الي كلتها قويه مره وعددها كبير
يزيد باستغراب: وليش سوت كذا
ساره بحيره: مدري بس انا متاكده انها سمعت شي عن طلال ,,, انا
خايفه يايزيد مره

يزيد: لاتخافي انشالله تقوم بالسلامه
قفل يزيد وهو منصدم من الي سمعه ,,, فيه بنت تقتل نفسها علشان واحد
,,, معقوله تحبه لهدرجه,,,رحمها وحزن لحالها,,,دق على طلال بيحكي له الي صار
يزيد: انت لازم تصلي لربك ركعتين شكر
طلال مستغرب: ياشينك انت وهالالغاز
يزيد: تدري كان بيصير لك شي تندم عليه طول عمرك
طلال معصب:بتتكلم والا اقفل
يزيد: مشاعل انتحرت
طلال كان بالسياره يدور من اول ماطلعت مشاعل من بيته للحين مارجع
,,, اول ماسمع ان مشاعل انتحرت مانتبه للسياره الي جنبه ,,, وسمع
طلال صوت الفرامل ,,, انتبه وحاول يتحاشى السياره قد مايقدر وطلال
معروف بانه سواق ماهر ,,, ولكن في هالمواقف المهاره ماتنفع ,,
ماينفعك الا رحمه الله,,, رحمة الله نزلت عليه وقدر يتحاشى السياره
بصعوبه ,, ووقف على جنب ,, يبي يستوعب الي سمعه
يزيد: سلامتك طلال صار لك شي
طلال:.........................
يزيد: الو طلال
طلال بصوت مخنوق :مشاعل ماتت
يزيد: مو انا اقول لك احمد ربك وصل ركعتين شكر انها ماماتت ,,,
كنت طول عمرك بتندم
طلال بخوف: ووينها الحين
يزيد: بالمستشفى ,,, بس ساره تقول انها ماصحت للحين وان الدكتور
خايف الحبوب الي كلتها تاثر عليها يمكن تاثر على مخها او يمكن تشلها ,,,
تدري بعض الناس اجسامهم مافيها مناعه قويه ,,, ادعي لها ياطلال
طلال بصعوبه يطلع الحروف:باي مستشفى هي
قفل منه بعد ماعرف المستشفى , ,, جلس يطالع الشارع الي كان موقف
فيه ,, كان طريق الدمام خالي تقريبا الا من بعض السيارات ,, بعد
ماطلعت مشاعل من عنده مشى بطريق الدمام لانه طويل ومو زحمه
مثل شوارع الرياض حب يفكر وينفرد بنفسه,, حب يفكر الي سواه صح
والا غلط؟؟ ,, مو مصدق الي صار ,,, مشاعل من كم ساعه كانت في
بيته تترجاه مايتركها,,, والحين هي تصارع الموت,,, بكى بدون صوت
,, كانت دموعه تاخذ طريقها على خده وهو يحس بانه حقير وتافهه
طلال نزل من السياره ,,,وصار يمشي ويمشي مايدري وين يروح صرخ
صرخه حس ان كل سكان العالم سمعوها ,,, جلس على ركبته ويدينه
مغطيه وجهه,,هو احقر من ان احد يشوفه طلال صرخ صرخه اقوى من
الاولى وحط راسه بالتراب كان ساجد"ااااااااااااااااااااااااااااااه

ااااااااااااااااااااااااااااااااااااه ااااااااااااااااااااااااااااااااااااااااااه"
ظل يصارخ لما خارت قواه " ليـــــــــــــــش ,,, ليـــــــــش ميشو ,,,
تبي تروحي وتخليني لوحدي ميشووووووووووووووووو احبك والله
احبك"
وظل يبكي ويبكي ويبكي لما حس ان دموعه بتغرق المكان ,,, حس ان
كل ذره تراب تطالعه وتقول تستاهل انت الي فرطت فيها
طلال"اااااااااااااااااااااااااااااااه يالقهر ,,, ميشو تكفين لاتروحي
وتخليني ,,, ميشو تكفين ياليتني انا مكانك,, ياليت ماتحسي بذره الم ,,,
ياليتني اموت مليون مره ولا تحسي بنغزه ,,مشاعل انا اسف تكفين عيشي "
وصار يبكي بصوت عالي كانه طفل,, حس انه انجن ,,, مستحيل يعيش
بدونها طالع السماء كان يدور الشمس يبي يعرف القبله,, تيمم وصلى,,
ولما سجد دعاء من قلبه كان الدعاء يحسه يطلع من قلبه ,,, كان يتمنى
يموت بس الله يقبل دعاه,,, اتجه لربه

رب عبدك قد ضاقت به الأسباب
وزاد به الهم والغم والاكتئاب
وأنت المرجوّ سبحانك لكشف هذا المصاب
يا من إذا دعي أجاب
يا سريع الحساب
يا كريم يا وهّاب
رب لا تحجب دعوتي
ولا ترد مسألتي
ولا تدعني بحسرتي
ولا تكلني إلى حولي وقوّتي
وارحم عجزي
فقد ضاق صدري
وتاه فكري
وأنت العالم سبحانك بسري وجهري
المالك لنفعي وضري
القادر على تفريج كربي
وتيسير عسري
اللهم افتح لدعائي أبواب الإجابة
يا من إذا سأله المضطر أجاب
يا من يقول للشيء كن فيكون
اللهم اشف مشاعل
اللهم اشفها وعافيها
اللهم ردها الينا
اللهم احفظها
اللهم ارحمها
ياارحم الراحمين
----------------------------------------------------------------------

كان متاكد انه يحب مشاعل بس مو لهدرجه: كان متوقع انه يقدر ينساها
بسهوله بس لما سمع انها انتحرت حس انه ممكن يفقدها ,,, حس بانها
دنيته ,,, ومستحيل يفقدها
-----------------------------------------------------------------------------------------
صحت مشاعل والكل ينتظر مشاعل ايش راح يصير فيها ,,, كانوا كلهم
بالانتظار ,,,, دخل عليهم الدكتور كانت عيونهم ع الدكتور ايش راح
يقول يبشرهم والا يعزيهم؟؟؟